Apróbase un regulamento provisorio para o uso de drons privados en España

Na rolda de prensa posterior ao Consello de Ministros de hoxe a ministra de Fomento, Ana Pastor, informou das medidas do Real Decreto-lei de medidas urxentes para o crecemento, a competitividade e a eficiencia, que inclúe un novo marco regulatorio que, aparte de garantir o mantemento dos aeroportos españois, tamén regula de xeito temporal as operacións con drons, concretamente os que teñan un peso menor a 150 quilogramos, establecendo as condicións de explotación destas aeronaves pilotadas por control remoto para traballos técnicos e científicos.
A regulación busca establecer un marco xurídico que permita o desenvolvemento en condicións de seguridade dun sector tecnoloxicamente punteiro e emerxente, para o que desenvolverase un regulamento completo nos vindeiros meses.
O regulamento temporal contempla escenarios nos que xa se poderán realizar traballos aéreos completando a Lei sobre Navegación Aérea de 1960, establecendo as condicións de operación deste tipo de aeronaves e outras obrigas. Polo momento só poderanse empregar os drons en espazo aéreo non controlado e sobre zonas non poboadas, para actividades tan diversas como a extinción de incendios, a vixilancia aérea (por exemplo, para a extinción de incendios), a publicidade aérea, as emisións televisivas, as operacións de emerxencia e outros traballos especiais.
Establécense categorías de drons por peso, cunha categoría de menso de 2 quilos, de ata 25 quilos e de máis de 25 quilos, aínda que en todos os casos tamén haberá certos requisitos que cumprir, como equipar as aeronaves con placa identificativa e contar os operadores de drons cunha licenza de piloto (ou demostrar que teñen os coñecementos para poder obtela).
Os drons de menos de 25 quilos non deberán estar inscritos no Rexistro de Matrículas de Aeronaves nin contar cun certificado de aeronavegabilidade.