Oculus organiza a súa primeira conferencia para desenvolvedores

A tecnoloxía de Oculus Rift, que durante os pasados días puido probarse na cidade da Coruña, parece estar a avanzar rapidamente para converterse nun produto final, estando xa a distribuírse as primeiras unidades do seu segundo kit de desenvolvemento (que parece corrixir as meirandes eivas das lentes de realidade virtual inicial), de aí que anuncien un grande evento no Hotel Loews de Hollywood (California) os días 19 e 20 de setembro no que se darán cita os creadores de software que fagan uso deste dispositivo de realidade virtual.
O congreso Oculus Connect busca xuntar a enxeñeiros, deseñadores e creativos de todo o mundo para compartir e colaborar na creación da mellor experiencia de realidade virtual posible, para o que celebrarán distintos obradoiros e sesións de networking para axudar a coñecer mellor a tecnoloxía de Oculus Rift e axudar a definir o futuro da realidade virtual.
Polo momento xa está confirmada a participación de Brendan Iribe (director xeral), Palmer Luckey (fundador), John Carmack (director de tecnoloxía) e Michael Abrash (director científico) de Oculus en cadanseu relatorio, para amosar o futuro do medio, detallándose o resto de oradores segundo se vaia achegando a data da celebración.