O social media de Galicia recibirá mañá os seus premios en Cangas

Os profesionais do social media en Galicia teñen mañá unha cita ineludible no Audiotorio Municipal de Cangas, onde se fará entrega dos Premios MexilOnseTuits, que este ano chegan á súa terceira edición, servindo así para salientar a riqueza e o nivel que este eido está a acadar na nosa comunidade. Oito son as categorías premiadas, pero o evento non se limitará a ser unha mera entrega de premios, senón que tamén estará arroupado polos profesionais Frankie Gómez e Eduardo García Erquiaga, que impartirán sendos relatorios para enriquecer a sesión matinal que tamén contará cunha mesa redonda na que participarán parte dos membros do xurado para discutir sobre a situación actual do sector en Galicia.
A gala estará conducida por Ana Celia Vázquez, presentadora de O Tempo na TVG, e será un excelente punto de encontro para numerosos profesionais dos medios sociais galegos, o que reforzarase nun xantar networking que contará cunha boa mostra gastronómica da man de Pintxos de Cris (marca de comida gourmet de Casa Quintela) e con sobremesas elaboradas pola célebre Merchi Rodal, coñecida polo grande público polas súas intervencións no programa Larpeiros da TVG, experiencia que incluso a levou a publicar un libro de grande éxito.
Tras o xantar a publicista Raquel Lemos unirase cunha en ioga para sorprender aos asistentes cunha sesión de branding ioga que pechará as actividades en terra, para que ás 17:00 horas poida iniciarse unha travesía en barco pola ría que permitirá ver dende a auga o impresionante transatlántico Oasis of the Seas.