Gradiant amosa en Londres os seus avances en recoñecemento biométrico

O centro tecnolóxico Gradiant vaise esta semana a Londres. E vaise para participar nun dos eventos máis senlleiros a nivel europeo en materia de tecnoloxías de recoñecemento biométrico, que son tecnoloxías que permiten a identificación das persoas a través dos seus trazos distintivos (iris, pegadas dixitais, xeometría da man) ou diversas particularidades de cada quen (voz, costumes á hora de escribir, acenos da man) e botando man de dispositivos smartphone ou do computador persoal. Falamos do evento Biometrics 2014, que se celebra ata o xoves 23 de outubro en Londres acubillando as principais empresas do escenario mundial en materia de biometría, integradores de sistemas e provedores de solucións de identificación e autenticación.
Polo que se refire á participación do centro galego Gradiant, dicir que se trata da primeira vez que acode ao evento internacional, facéndoo calidade de expositor, “o que nos dará oportunidade de expor o noso cartafol de tecnoloxías neste eido, á vez que seguimos establecendo contactos cos principais actores do sector en todo o mundo”, sinalan fontes do centro tecnolóxico con sede en Vigo. Lembrar que as solucións de recoñecemento biométrico que ofrece Gradiant tiveron unha acollida moi positiva a nivel internacional hai menos dun mes, no Global Identity Summit ”14 en Tampa, Florida (EEUU). A presenza no Biometrics 2014 de Londres vén continuar e reforzar “a nosa actividade internacional neste sector”, engaden os responsables do centro.