Na Rede os audiovisuais do proxecto que achega aos nosos rapaces aos segredos do mar, KaleidoLabs

Xa de poden ver na Rede os froitos do proxecto KaleidoLabs, iniciativa liderada polo Instituto de Investigacións Mariñas (IIM) para achegar a investigación mariña que se realiza en Galicia ao público infantil. Trátase, máis polo miúdo, de oito audiovisuais en cuxa creación e desenvolvemento participaron arreo estudantes dos nosos centros educativos e máis usuarios de APAMP (Asociación de Familias de Persoas con Parálise Cerebral). O proxecto KaleidoLabs desenvolveuse dende decembro de 2013 a través de diversas actividades de divulgación inseridas en cinco laboratorios (Valoriz@lab, Dibu@lab, Foto@lab, Especi@lab e Kaleid@lab) nos que o alumnado elaborou múltiples recursos gráficos para as achegas audiovisuais.
Pola súa banda, a produción dos monicreques e a realización das escenas correu a cargo de Monicreques Babaluva e o alumnado do CPI Panxón. Noel Rodríguez e Martín Pérez foron os responsables da realización e a produción dos audiovisuais. O IIM contou co apoio da Unidade de Cultura Científica (UCC) do CSIC en Galicia e o financiamento da Fundación Española para a Ciencia e a Tecnoloxía.
Segundo fan saber os responsables de proxecto, os oito audiovisuais resultantes son “unha singular proposta” que combina “de forma orixinal” imaxes do noso medio natural e dos laboratorios das instalacións do IIM con música, ilustracións, escenas con monicreques e fotografías. Segundo engaden, “amosan a importancia dos océanos, da conservación das especies e a necesidade de contar co persoal científico para protexer os recursos”.
Como dixemos, o resultado de todo isto pode verse agora íntegro na Rede. Os vídeos están adicados, cada un, a unha temática particular, aínda que todos comparten o alicerce común de estar vencellados ao ámbito do mar. Deste xeito, os traballos en oceanografía, os problemas da conservación do cabaliño do mar, a ecoloxía dos cefalópodos, a xestión de pesqueiras, o cultivo de mexillón, as patoloxías en acuicultura, a microbioloxía e mais a tecnoloxía de alimentos de orixe mariño contan con cadansúa produción monográfica. Os audiovisuais están orientados a escolares de Infantil e Primaria.