A Deputación de Lugo, entre os organismos provinciais que máis tiran partido do Twitter

Estar ou non estar nas redes sociais é algo crucial a día de hoxe para calquera organismo ou individuo que se queira dar a coñecer. Tomando boa nota disto a Deputación de Lugo vén de informar que superou a barreira dos 5.000 seareiros na súa conta oficial en Twitter,@depulugo, feito que a xuízo do organismo provincial deixa ver que cada vez máis cidadáns da provincia consideran de gran utilidade estar en contacto permanente coa súa administración.
A transcendencia deste feito enténdese moito mellor tendo en conta o contexto en que se produce. Así o explica a entidade lucense: “En Pontevedra, por exemplo, son 4.130 os que seguen a conta da Deputación; Ourense suma 992 seareiros e a Deputación da Coruña ten 875 seguidores; a maiores, no conxunto de España son poucas as deputacións que melloran os números de Lugo, e as que o fan corresponden a provincias moito máis poboadas, como Málaga, Valencia, Córdoba ou Granada”.
Máis polo miúdo, só durante o ano 2014, o perfil @depulugo publicou 2.200 chíos, que recibiron 1.554 rechíos e 1.027 favoritos. Esta actividade nas redes sociais, engade a entidade pública, esténdese ao blog oficial da Deputación de Lugo, blog.deputacionlugo.org, que conta cada día con máis visitantes; ou á páxina en Facebook: facebook.com/diputacionlugo, con 3.167 gústame a día de hoxe. A canle en YouTube contén 584 vídeos que suman máis de 82.000 reproducións, mentres que o perfil aberto en Instagram, que foi o primeiro en España para unha administración provincial, amorea preto de 500 seguidores.
Para o organismo lucense, a explicación destas cifras está “no xeito no que a Deputación afronta a conversa coa súa comunidade, de maneira achegada, compartindo numerosa información sobre a provincia, ligazóns de interese, respondendo dúbidas e consultas, promovendo iniciativas… en definitiva, empregando estas ferramentas para mellorar a visibilidade da provincia e dos seus valores nas contornas dixitais e, ao mesmo tempo, facendo doada a participación cidadá cunha comunicación inmediata”.