As estudantes de Belas Artes (Pontevedra) lanzan web para amosar os seus proxectos

Os estudantes da Facultade de Belas Artes (Campus de Pontevedra) veñen de pór en marcha unha nova web para dar a coñecer o talento das creadores e creadores que alí se xuntan. Trátase de Espazo 23, unha coidada web, moi destacable no formal e máis no fondo, que recolle para si o nome do lugar onde se desenvolveron boa parte das xuntanzas que deron orixe ao proxecto. A páxina, un espazo no “que amosar o que facemos”, sinalan, adícase a dar conta dos proxectos, nos eidos da arte e do deseño, tanto do alumnado como dos estudantes que acadan cadansúas titulacións.
Trala posta en marcha de Espazo 23, a xeito de principais impulsoras, atópase un grupo constituído polas artistas Ana Pérez, Dana Troiteiro, Bea Gregores, Arze, Miriam Iglesias, Nerea Castro e Nuria Carbó. Nesta súa primeira andaina, a web-exposición está a amosar as obras de estudantes e titulados como Alba Fandiño, Carlos Aldao, Mónica Bastón ou o Carlos Aldao, do estudo Huecocreativo. Segundo as impulsoras da iniciativa, Espazo 23 é o resultado final “dun proxecto que vén de longo, ao que levabamos dándolle voltas moitos meses, e que pasou por moitas fases, en constante evolución, e todo co propósito de avanzar desde o actual formato, próximo ao dunha revista dixital, cara a un formato e uns contidos máis experimentais”. Segundo indica, a intención é que “evolucione cara algo máis próximo ao libro de artista, neste caso dixital”.
Os primeiros contidos abrangueron a realización de entrevistas a alumnos e egresados, coa idea de dar a coñecer a iniciativa e axudar a que esta se consolide e siga medrando. De feito, entre os retos vindeiros e inmediatos, as responsables da web tentarán incorporar a novos alumnos e alumnas a un proxecto “no cal todos poden participar e amosar o seu traballo”, de tal maneira que “ideas e diferentes axuden tamén a esa evolución” do portal.