Telefónica de España nomeou a Marta Menéndez nova directora autonómica en Galicia

A dirección autonómica de Telefónica de España vén de recaer en Marta Menéndez, quen substitúe no cargo a Manuel Alonso, a quen reportará, e que a partir de agora centrarase exclusivamente nas súas responsabilidades como director de Administracións Públicas e Grandes Contas do Territorio Norte de Telefónica de España, que ademais de Galicia inclúe Asturias, Cantabria, País Vasco e Aragón. O nomeamento de Marta Menéndez responde á aposta de Telefónica por reforzar a súa presenza institucional en Galicia e a súa interacción cos axentes empresariais, sociais, culturais e políticos da comunidade.
Menéndez, nada en Madrid hai 42 anos, é licenciada de Ciencias Económicas e Empresariais e en Dereito por ICADE, amais de MBA e Master en Dirección de Sistemas e Comunicacións pola Escola de Telecomunicacións da Universidade Politécnica de Madrid, e leva case dúas décadas de desenvolvemento profesional en Telefónica e 11 anos residindo e ocupando distintos cargos de responsabilidade en Galicia.