Chegan novas iniciativas de inclusión dixital da man de nove centros CeMIT

Xa sabemos cales serán os centros da rede CeMIT que concorrerán na segunda edición do proxecto de innovación socio-dixital CeMIT-Innova unha das iniciativas do Plan de Inclusión Dixital de Galicia 2020. Segundo fai saber a Axencia para Modernización Tecnolóxica de Galicia (AMTEGA), foron seleccionados os concellos e aulas CeMIT de Ares, A Bola, Celanova, Cuntis, Oroso, Mos, Ourense (A Molinera), Pontedeume e Santiago de Compostela. Os centros seleccionados por AMTEGA levarán a cabo (este ano) actividades tecnolóxicas de divulgación e formación que atendan ás necesidades de alfabetización da súa contorna. Máis en detalle serán actividades centradas no envellecemento activo, no pulo á empregabilidade, no impulso ao comercio ao turismo local ou no fomento da integración social dos colectivos en risco.
Polo que atinxe á achega da aula CeMIT de Ares, céntrase en boa medida no seu proxecto Ares GNU. Este proxecto busca mellorar o acceso e os coñecementos tecnolóxicos dos veciños do concello, a través da difusión, utilización e desenvolvemento do software libre en diversas actividades como un ciber encontro, o mapeado da cidade ou o desenvolvemento dunha aplicación móbil de servizos da aula.
O Concello de Pontedeume desenvolverá na súa aula CeMIT o proxecto That´s Pontedeume. Come Here!! para favorecer o envellecemento activo e o coñecemento da lingua inglesa, a través de unidades didácticas culturais sobre o patrimonio e a historia local. Todo iso utilizando Internet como medio de aprendizaxe.
En Oroso a aula CeMIT porá en marcha a Plataforma de e-commerce local, co obxectivo de crear un directorio de negocios, empresas e profesionais, cun comparador de produtos de consumo ou servizos locais, para promover economicamente o tecido empresarial con esta plataforma web.
Santiago traballará desde a súa Aula CeMIT na promoción da empregabilidade a través da intermediación, selección e adecuación profesional, co seu proxecto Anel de coñecemento, unha plataforma online de contidos e servizos dixitais para o emprego.
A aula CeMIT de Mos, a través do proxecto InnovaTIC Mos, proponse favorecer o acceso ao emprego a través de diversos servizos dixitais, así como favorecer a visualización das entidades asociativas, mediante a súa participación en redes sociais.
Pola súa banda, Cuntis traballará a través das TIC para favorecer a igualdade de oportunidades de persoas con necesidades especiais, dirixido á intervención socioeducativa co alumnado coas devanditas demandas por motivos de diversidade funcional ou cognitiva.
Desde Ourense para o mundo é o nome da iniciativa de traballo en rede e inclusión laboral que se vai desenvolver desde a aula CeMIT de Ourense (La Molinera) para a procura de oportunidades entre mozas con talento que se marchan ao estranxeiro e os emigrantes descendentes de españois que están noutros países e queiran volver.
A aula CeMIT de Celanova proponse mellorar a accesibilidade da cidadanía á información e aos servizos municipais, a través duna aplicación de dinamización cultural, empresarial e social APP Local.
O proxecto da Aula CeMIT da Bola, Teatro Dixital histórico-cultural, busca a promoción turística do concello a través da creación dunha canle de vídeo na Internet, dirixida a difundir as súas actividades culturais.
Plan de Inclusión Dixital de Galicia 202
O Plan de Inclusión Dixital de Galicia 2020 presentado o pasado 18 de maio perante os máis de 700 aliados cos que conta busca acadar “unha sociedade plenamente dixital formada e capacitada non uso das tecnoloxías, capaz de explotar e aproveitar todo ou potencial das TIC a nivel persoal, profesional e comunicativo”. Para conseguilo, ofrece á sociedade galega un servizo integral de dixitalización que abrangue desde as accións para a alfabetización dixital ata aquelas que permitan a calquera persoa, con independencia do nivel dixital non que se atope, avanzar, madurar e acceder a maiores niveis de coñecemento e uso das TIC.