Samsung podería substituír o LED de notificacións dos móbiles por unha zona luminosa ao redor da cámara traseira

O vindeiro 2 de agosto Samsung celebrará un evento no que espérase que presente o seu novo Galaxy Note, que tería certa polémica pola súa numeración (sería un Note 7, pese a non existir un Note 6 e cun Note 5 que só se comercializou nuns poucos países) e que incluso podería contar cunha versión edge (ou sexa, con pantalla curva nos seus laterais), e aínda que polo momento non hai ningún dato oficial, hai unha interesante filtración sobre unha das súas novas características: o Smart Glow.
Estariamos ante unha alternativa para o LED de notificacións que consistiría nunha zona ao redor da cámara traseira do smartphone que se iluminaría para advertir de mensaxes e chamadas entrantes, alertas, o estado da batería… ou sexa, para facer exactamente a mesma función que o LED de notificacións, aínda que o documento filtrado tamén detalla que serviría como asistente para disparar selfies coa cámara traseira en combinación con tecnoloxía de recoñecemento facial, de xeito que en canto a nosa cara estea ben encadrada o Smart Glow iluminarase en cor azul para disparar unha fotografía 2 segundos despois.