Prenden en Melide a un home por vender ilegalmente medicamentos a través da Rede

Axentes da Policía Nacional prenderon en Melide a un home acusado de venda ilegal de medicamentos a través da Internet, atopándose no seu domicilio sustancias depresoras, estupefacientes e potenciadores para a disfunción eréctil, material preparado para a súa distribución.
As autoridades policiais aseguran que o detido chegou a utilizar ata 10 contas de correo electrónico co obxectivo de multiplicar o volume dos seus anuncios e dificultar o seu rastrexo. Ao parecer, adquiría os medicamentos a través de páxinas web fóra de España empregando a rede Tor e pagamentos en Bitcoin, procurando así ocultar a súa actividade.
As actuacións foron produto do labor preventivo desenvolvido polos axentes na Internet, que tras detectar multitude de anuncios en liña nos que ofrecíanse medicamentos para combater a obesidade (cuxa venda está prohibida en España) recompilouse e analizouse grande cantidade de informacións destas ofertas, como os enderezos de correo electrónico empregados e os distintos enderezos IP, chegando a determinar a relación dos envíos que o investigado realizara no territorio estatal, conseguindo así a súa identificación, para proceder agora á súa detención por un delito contra a saúde pública.
A operación desenvolvérona axentes da Brigada Central de Investigación Tecnolóxica, pertencente á Comisaría Xeral da Policía Xudicial coa colaboración da Brigada Local da Policía Xudicial de Santiago de Compostela.