A industria e os gobernos europeos xuntan forzas a prol da ciberseguridade

Este martes 5 de xullo asinouse na sede do Parlamento Europeo en Estrasburgo o contrato de colaboración público-privada entre a Comisión e a industria europea da Ciberseguridade representada pola organización ECSO. O obxectivo deste marco dinámico de cooperación (partenariado) é dar forma a unha alianza estratéxica para estimular a industria da seguridade cibernética en Europa, nos ámbitos da investigación estratéxica e a innovación. Segundo informa o Centro Tecnolóxico Gradiant, co-fundador da ECSO, a Unión Europea investirá 450 millóns de euros nesta asociación no marco do seu programa de I+D Horizon 2020. A cambio, espera que cada euro de financiamento público xere investimento privado que triplique esa cifra, achegados polos axentes do mercado da ciberseguridade representados por ECSO. En total, agárdase que este marco de cooperación xere ao redor de 1,8 millóns de euros de investimento para o ano 2020 e desenvolver solucións innovadoras e de confianza.
ECSO, explica Gradiant, traballará directamente coa Comisión Europea para mellorar a política industrial de Europa en materia de ciberseguridade, centrándose na innovación e seguindo un plan estratéxico de I+D. Este partenariado público-privado axudará a crear confianza entre os Estados membros, actores industriais e usuarios finais, mediante o fomento -de abaixo cara arriba- da cooperación estratéxica e a construción dun mercado sólido, harmonizado e competitivo para a ciberseguridade en Europa a través de diversos sectores como enerxía, transporte, saúde ou finanzas.
No acto formal de sinatura do acordo (protagonizado polo vicepresidente para o mercado único dixital, Andrus Ansip e o comisario de Economía Dixital e Sociedade, Gunther Oettinger) reuníronse representantes de alto nivel de ECSO, membros de 48 organizacións públicas e privadas de ata 14 países diferentes. A sinatura foi precedida por un breve intercambio de puntos de vista entre o comisario Oettinger e os participantes. Este engadiu que “Europa precisa alta calidade” e que se abre con este partenariado “unha gran oportunidade para a nosa industria da seguridade cibernética de competir nun mercado de rápido crecemento global”. Oettinger fixo un chamamento aos Estados membros da UE e aos corpos de seguridade estatais para fortaleceren a cooperación e axuntar os seus coñecementos, recursos e experiencia para “aumentar a seguridade cibernética de Europa”. Na súa opinión, a asociación asinada hoxe coa industria marca un fito en materia de protección das redes e da información.
Luigi Rebuffi, pola súa banda, sinalou que a sinatura desta alianza coa Comisión Europea representa un paso fundamental na cooperación público-privada para o progreso da I+D en ciberseguridade e o medre dunha industria TIC competitiva. Segundo engadiu (co fin de amosar os bos agoiros cos que xorde esta iniciativa conxunta), ECSO é “unha organización de rápido crecemento que xa recibiu máis de 120 solicitudes de adhesión, proba do compromiso a prol do desenvolvemento cooperativo dos axentes de seguridade cibernética para impulsar un mercado sustentable en Europa garantindo a autonomía dixital e contribuíndo aos obxectivos do mercado único dixital”.
O acordo de colaboración público-privado, engadiron, baséase en plans de traballo para as actividades de I+D que son o resultado “dun proceso de consulta aberta e que foron avaliados positivamente pola Comisión Europea coa axuda de expertos independentes”. Apoiarase ademais na Axenda Estratéxica de Investigación nas TIC e nas comunicacións seguras, desenvolvida pola Plataforma NIS e publicada en setembro de 2015.
Orixe da ECSO
Lembrar que o 20 de xaneiro de 2016 levouse a cabo en Bruxelas un workshop sobre o contrato de asociación público-privada entre a Comisión Europea, os Estados membros e a industria da seguridade cibernética, no marco do cal se deron os primeiros pasos para constituír a ECSO (Asociación para a Ciberseguridade en Europa). ECSO, da que como dixemos Gradiant é membro fundador, é unha organización paneuropea de grandes empresas, PEME, start-ups, centros tecnolóxicos, universidades, usuarios e operadores, asociacións, clústers, países e administracións públicas rexionais e locais dos países membros. ECSO é unha asociación sen fins de lucro totalmente autofinanciada (ASBL) e suxeita ao marco regulamentario belga e europeo.