BlackBerry confirma que deixa a fabricación de móbiles a terceiras compañías

Durante o verán, e de xeito non oficial, constatábase que BlackBerry cesaba a produción de terminais co sistema operativo BlackBerry 10, ou sexa, que deixaba como única oportunidade para manterse no negocio da fabricación de teléfonos móbiles no sistema operativo Android pero, co gallo da presentación dos resultados do segundo trimestre do ano, no que a compañía dobrou interanualmente os seus ingresos na súa división de software, o que levou ao director xeral de BlackBerry, John Chen, a anunciar que “a compañía planea rematar todos os seus desenvolvementos internos de hardware e externalizar tal función a socios”, ou sexa, que confírmase a liña que estaban a seguir nos últimos meses: os móbiles baixo a marca BlackBerry serían simplemente produtos de Alcatel cunha personalización do seus sistema operativo.
Durante o trimestre contabilizado (que é o trimestre fiscal que remata o 31 de agosto) a compañía tería rexistrado unhas perdas de 372 millóns de dólares, de aí que fose inevitable tomar medidas drásticas nas súas liñas de negocio menos rendibles, e centrarse nas áreas que son realmente produtivas, de xeito que xa podemos dicir que BlackBerry dixo adeus ao tempo no que era un fabricante de telefonía móbil, e agora céntrase no software e en servizos para maximizar os seus beneficios.
Estes anuncios coinciden coas filtracións do que sería o seu vindeiro smartphone fabricado por Alcatel, o DTEK60, que sería un interesante trebello con pantalla AMOLED Quad HD de 5,5 polgadas, procesador Qualcomm Snapdragon 820, 4 GB de RAM, 32 GB de almacenamento interno, cámaras de 21 e 8 Mpíxeles, lector de pegadas dixitais (converténdose no primeiro dispositivo baixo a marca BlackBerry en contar con tal funcionalidade) e batería de 3.000 mAh.