Un ataque provoca a publicación de mensaxes a prol de Erdoğan en Twitter

Nas últimas horas un inmenso número de contas de usuario de Twitter entre as que non faltan medios de comunicación, organismos internacionais e grandes negocios publicaron unha mensaxe cos cancelos #Nazialmanya e #Nazihollanda acompañados pola icona dunha esvástica que está escrita en turco, e apoiaría ao presidente Erdoğan, o que creou unha grande preocupación ante a posibilidade de que tivesen vulnerado a seguridade de Twitter, pero realmente a cousa non foi así, senón que a culpa deste incidente é que o servizo de terceiros Twitter Counter padeceu unha intrusión, permitindo que os atacantes puidesen aproveitar os permisos da aplicación para acceder ás contas de Twitter dos seus usuarios para facer unha publicación suplantando a súa identidade.
Dende Twitter Counter xa tomaron medidas para que non poida continuar a aproveitarse a súa intrusión para difundir mensaxes sen o consentimento dos usuarios, pero este suceso debería axudar a animar aos usuarios de Twitter a revisar a sección de Aplicacións na configuración de Twitter, revogando os permisos de aplicacións e servizos que xa non usen e, especialmente, que incluso poidan ter desaparecido, xa que os permisos concedidos no pasado poden aproveitarse no futuro provocando problemas como este ataque dirixido a Alemaña e Países Baixos polos seus conflitos con Turquía.