Instagram permite gardar contidos en coleccións

Nos últimos días Instagram comezou a implantar unha nova funcionalidade na súa aplicación móbil, que consiste en ampliar a opción de poder gardar publicacións, de xeito que agora, ao premer sobre a icona do marcador para gardar, se deixamos o dedo pulsado un intre teremos a opción de engadir a imaxe a unha colección á que poderemos pór nome, o que facilita a organización das imaxes e vídeos que queiramos conservar.
Tamén é posible crear coleccións dende a propia sección na que están os contidos gardados, premendo no signo de máis na esquina superior dereita da aplicación, tras o que poderemos definir o nome da colección e as entradas gardadas que desexemos introducir na mesma.
Polo momento estas coleccións son privadas, un simple xeito de conservar os nosos contidos favoritos de Instagram sen ter que gardalos en local, o que é unha grande diferenza con respecto aos paralelismos que moitos queren establecer entre esta funcionalidade e Pinterest, xa que desta volta a recompilación en coleccións non é visible para o resto de usuarios, de xeito que non sería unha prestación social (aínda que non resultaría sorprendente que evolucionase dese xeito no futuro).