Os iPhone 5 deberán actualizarse para poder funcionar con normalidade

Aínda que o número de unidades do iPhone 5 en uso é bastante reducido, este teléfono de Apple volve á actualidade xa que Apple está a alertar aos usuarios que quedan con este móbil e que non o teñen actualizado á última versión de iOS dispoñible para eles (10.3.4) que actualicen o software do dispositivo antes do 3 de novembro se non queren ter serios problemas.
A actualización de iOS nos iPhone 5 é imprescindible para manter a precisión do GPS e continuar a utilizar funcións que dependen de que a data e a hora sexan correctas, como serían a App Store, iCloud, o correo electrónico e a navegación web, ou sexa, que quedarían cun dispositivo que practicamente só serviría para falar por teléfono.
A actualización dos dispositivos pode realizarse sen fíos antes do 3 de novembro pero, a partires desa data, a actualización haberá que facela utilizando un ordenador, xa que as actualizacións de software remotas e a copia de seguridade de iCloud están entre os servizos que deixarán de funcionar en terminais sen actualizar.
Resulta especialmente rechamante que Apple teña que instar aos usuarios de dispositivos lanzados hai 7 anos a que actualicen o seu software, pois xa deran 5 anos completos de soporte ao iPhone 5 (iOS 10.3.3 lanzouse en xullo de 2017) e o lanzamento de iOS 10.3.4 o pasado verán pode considerase algo excepcional, que semella destinado a evitar que acusen a Apple de promover a obsolescencia programada.