Spotify incorpora historias no móbil

Coa estrea oficial dos Fleets en Twitter xurdiron moitas bromas na Rede suxerindo a incorporación de historias en aplicacións, cada unha máis absurda que a anterior, para dar a entender que iso de facer que todas as redes sociais teñan as mesmas funcións está a converterse nalgo ridículo, de aí que resulte moi rechamante que Spotify estea a integrar historias nunha selección de álbums e listaxes de reprodución.
Probablemente a listaxe de reprodución máis notable na que están a introducirse as historias sexa a de Christmas Hits, xa que estamos ante unha selección musical de temas de Nadal que durante o mes de decembro ten moito éxito, facilitando así que moitos usuarios reaccionen ante a aparición das historias, que como na meirande parte das plataformas sociais, está accesible a través dun botón con forma circular que ao pulsar sobre o mesmo leva a un vídeo vertical. Trátase dun xeito de engadir contidos creados por artistas e optimizados para o móbil, e que irían na liña do que xa publican en cadansúas redes sociais, polo que non é algo que realmente engada valor, nin pode explicarse ben a súa necesidade.
De feito, dende Spotify recoñecen que se trata dunha proba, polo que dan a entender que se detectan unha boa aceptación deste formato de historias, espallarano entre os artistas e usuarios, pero se o público ignora ese contido actuarán en consecuencia.
Actualmente xa teñen historias Snapchat, Instagram, Facebook, LinkedIn, YouTube e Twitter, o que está a saturar do formato aos usuarios. Veremos a onde leva este camiño, pero confiemos en que non introduzan as historias no Microsoft Excel ou en calquera outra ferramenta de colaboración, xa que parece evidente que aos usuarios non lles agrada que todas as aplicacións parezan a mesma.