Filoloxía da UDC mostra nun congreso o potencial da Intelixencia Artificial no ámbito lingüístico

A Facultade de Filoloxía da Universidade da Coruña organiza estes días un congreso virtual internacional sobre lingüística e Intelixencia Artificial. O evento, a 38 edición do Congreso Internacional da Asociación Española de Lingüística Aplicada (AESLA), foi inaugurado polo reitor da Universidade da Coruña, Julio Abalde. Desenvólvese en formato virtual para garantir a seguridade das e dos participantes. O congreso está dirixido pola profesora da Facultade de Filoloxía Begoña Crespo, que este ano pon o foco na revolución lingüística que poñen en marcha as tecnoloxías con capacidade de avaliar e información e tomar decisións.
No acto de apertura, onte á tarde, participou ademais o presidente de AESLA, o profesor da Universidad de La Laguna, Francisco Cortés, ademais da decana da Facultade de Filoloxía, María Jesús Lorenzo, e a directora do departamento de Letras da UDC, María Teresa López. O profesor da Universidade da Coruña Carlos Gómez, investigador Starting Grant da Unión Europea, impartiu a conferencia inaugural, Linguistic Information in Natural Language Processing: Examples from Sentiment Analysis. Gómez desenvolve un proxecto de investigación na fronteira entre a informática e a intelixencia artificial, baseado na incorporación da análise sintáctica ás funcións dos ordenadores de forma rápida.
O congreso internacional de AESLA estase a celebrar ata este venres con máis de 150 conferencias de relatores nacionais e internacionais. Ademais das sesións plenarias a cargo de prestixiosos lingüistas nacionais e internacionais, como Carlos Gómez, o profesor da Universidade de Oxford Ernesto Macaro que hoxe impartirá a sesión Exploring language issues in English Medium Instruction, e a profesora da Universidade Politécnica de Valencia Marisa Carrió coa intervención Las lenguas de especialidad: objetivos conseguidos, oportunidades y retos, o congreso conta con varios paneis científicos que superan as 150 sesións relacionadas coa adquisición e aprendizaxe; ensino de linguas e deseño curricular; lingua para fins específicos; psicoloxía da linguaxe, linguaxe infantil e psicolingüística; sociolingüística; pragmática; análise do discurso; lingüística de corpus, computacional e enxeñaría lingüística; lexicoloxía e lexicografía e tradución e interpretación.