A Mesa vén de recordarnos unha realidade incontestable: a ausencia de contidos en galego nas grellas temáticas infantís das operadoras e plataformas de TV por fibra óptica, tanto o que se se refire a produtos en versión orixinal como a dobrados ou lexendados. A Mesa plasmou este e outros datos máis específicos no Informe Xabarín, no que se fai saber que só 1 de cada 1.000 títulos nas ditas grellas están dispoñibles a día de hoxe na nosa lingua. Ademais, o informe recolle que TVE non chega a 40 minutos diarios en galego fronte ás 119,4 h diarias en castelán.
A Mesa pola Normalización publicou os resultados dun informe que cualifica de “demoledor” despois de se reunir cos grupos parlamentares de PP, BNG e PSdG para presentarlles a Iniciativa Popular ao Parlamento de Galiza, na que insta ao Goberno galego a tomar medidas para que a CRTVG aumente a oferta en galego destinada á nenez e á mocidade nas televisións públicas a través dunha canle Xabarín. Na proposta solicítase que esta canle achegue “programación atractiva, actual, educativa e de produción galega dirixida ao público infantil e xuvenil e dispoñible en todas as plataformas dixitais”.
Tamén se pide unha app actualizada para todos os dispositivos e que conte amais con programas e xogos. Asemade, a iniciativa insta a que toda a programación televisiva, incluídas as plataformas e TVE, teñan versión en galego orixinal, dobrada ou lexendada.
Boa receptividade
Para o presidente da Mesa, Marcos Maceira, “a receptividade mostrada polo grupos parlamentares é esperanzadora”. Segundo indicou, “as posibles dificultades técnicas e administrativas na emisión dunha canle Xabarín da TVG por TDT poderían ser salvadas incluíndoa nos paquetes básicos de TV por fibra óptica, satélite, ADSL e tecnoloxía móbil así como dispoñibilizando a aplicación Xabarín para todos os dispositivos e televisións smart”.
Maceira lembrou que a iniciativa Xabarín promovida pola Mesa procura tamén que o Parlamento galego reclame ao Goberno español “que a TVE exerza como canle pública dobrando e lexendando ao galego todos os seus contidos e que as cotas que fixará a nova Lei Xeral do Audiovisual para o castelán na dobraxe, lexendaxe ou financiamento de producións audiovisuais, sexan idénticas para o galego”. Deste xeito, indicou, “ademais dos posibles acordos coa Xunta, tamén a lexislación garantiría os contidos en galego en plataformas como HBO, Netflix ou Filmin”.
Nas súas palabras, “o galego ten que deixar de estar excluído da oferta audiovisual” recorda Maceira. “É lamentable que unha meniña ou un meniño galego en Galiza teña mais opcións de visualización contidos en francés ou un rapaz ou unha rapariga en chinés ou árabe que en galego” denuncia.
Maceira fixo saber que “todos os partidos entenderon que o galego non pode ficar excluído da oferta audiovisual e que cómpren medidas urxentes”.
Neste momento, só a TVG garante a presenza do galego na grella televisiva, “mais cómpre ampliar a súa oferta cunha canle temática Xabarín para operadoras como R, Movistar ou Vodafone”, indicou, incidindo na necesidade de adaptar a aplicación Xabarín a todo tipo de dispositivos.
