Máis de cincuenta estudantes da nosa terra lanzaron satélites dende As Rozas ao abeiro do programa CanSat

Máis de medio cento de estudantes de nove institutos galegos participaron este mércores 26 na fase galega do certame de proxectos espaciais CanSat, a competición promovida pola Axencia Espacial Europea que para o seu impulso na nosa terra contou co apoio da Xunta. O alumnado implicado na actividade realizou todas as fases dun proxecto espacial real, desde a elección dos obxectivos da misión ata o deseño do CanSat. Este consistiu nun proxecto de simulación real dun satélite do tamaño dunha lata de refrescos. Este mércores fixéronse os lanzamentos dende o aeródromo das Rozas, en Lugo.
A inauguración da xornada contou coa participación do o conselleiro de Cultura, Educación e Universidade, Román Rodríguez, que agradeceu o esforzo de todos os participantes, desde alumnado ata profesorado, “por formar parte unha vez máis deste desafío no que Galicia demostra o interese e as posibilidades da formación en tecnoloxía para as novas xeracións”.

Os alumnos participantes foron os equipos Space G e DPI do IES Pontepedriña de Santiago; MeteoSputnik e Starlinkpvtj do IES Eusebio da Garda, na Coruña; Le Sat, do IES A Xunqueira I de Pontevedra; PonteSat do IES Eduardo Pondal de Ponteceso; Planeta RDT do IES Rego da Trabe de Culleredo; SaviSAT do CPI Dr. López Suárez de O Saviñao; BujanSAT do IES David Buján en Cambre; MontecasteloSAT do CPR Las Acacias, en Vigo e Ortisats, do IES Ortigueira.
O desafío común consistiu en introducir nun espazo reducido os principais subsistemas dun satélite real. No transcurso da xornada deron a coñecer os seus proxectos e lanzaron desde un dron os CanSat deseñados (do inglés can, lata; e sat, satélite) ata unha altitude aproximada dun quilómetro e, a partir de aí, comezou a misión práctica, que consistiu en lograr a execución dun experimento científico, acadando unha aterraxe sen danos e a análise de datos recompilados durante o descenso.
O lanzamento foi gravado e documentado e formará parte dun audiovisual que poderá visualizarse na vindeira sesión do día 2 de xuño, cando se dará conta do proxecto elixido. Este terá ocasión de participará con equipos de toda España no verán en Granada. Á súa vez, o gañador da competición nacional poderá participar na competición internacional CanSat 2021 da Axencia Espacial Europea (ESA) a nivel europeo, esta vez de xeito virtual en setembro.