Vodafone e Marc Vidal achegan ante as empresas galegas as claves dunha óptima transformación

Vodafone vai organizar este 16 de xuño un evento online sobre transformación empresarial galega co experto en tecnoloxías aplicadas aos negocios Marc Vidal a desenvolver baixo o epígrafe A evolución do posto de traballo. A cita vén da man do Observatorio Vodafone da Empresa e dará comezo ás 10.00 horas, sendo necesario un rexistro previo online.
Falarase, cunha óptica galega, sobre as novas formas de traballar e sobre as vantaxes que achegan as ferramentas disruptivas ás organizacións, sobre cales foron os principais retos que tiveron que superar as empresas que implantaron o posto de traballo dixital e sobre como as novas tecnoloxísa aumentan a flexibilidade, a capacidade de adaptación e evolución e a sustentabilidade do traballo. Tamén se falará das oportunidades que abren os fondos europeos Next Generation, que, segundo o Observatorio Vodafone da Empresa, supoñen “unha garantía para acometer con éxito a transformación dixital das organizacións”.
A cita conta co apoio de Microsoft e Atos. Comezará ás 10.00 horas cunha presentación a cargo de Francisco Vallejo, director territorial en Galicia de Vodafone Business, que presentará o Informe de Dixitalización do Observatorio Vodafone. A continuación será a quenda de Marc Vidal, co relatorio Visión do Posto de Traballo Dixital, a partir das 10.05 horas. Ás 10.20 Marc Vidal entrevistará á directora da axencia AMTEGA, Mar Pereira, sendo os fondos Next Generation o fío temático do coloquio. A cita rematará un pouco máis tarde, cunha mesa redonda arredor da seguinte cuestión: Evolución das novas formas de traballo e dixitalización, moderada por Marc Vidal. Participarán Antonio Cruz, director de Modern Worplace España de Microsoft, Jorge González, director de Strategic Deals e Workplace de Atos, María José García, directora da Área de Modernización AAPP de AMTEGA, e Richard Villaverde, CIO de CAPSA Food (Central Lechera Asturiana).