Falece John McAfee nun centro penitenciario catalán

Aínda que John McAfee está considerado como o desenvolvedor do primeiro antivirus informático comercial, hai moitos anos que non se dedica a ese negocio, e a súa figura veuse ensombrecida por numerosos escándalos e detencións ao longo do mundo, chegando incluso a centrar unha completa reportaxe sobre o seu polémico paso por Belice, territorio do que foi expulsado e onde o acusaban de ter asasinado a un veciño.
Este excéntrico personaxe visitaba con frecuencia España, e precisamente tras unha das súas viaxes o ano pasado protagonizou unha das súas anécdotas máis ridículas, ao negarse a empregar máscara nun aeroporto alemán, tras o que decidiu empregar unhas bragas a xeito de máscara, o que ocasionou a súa detención, que non sería a última, xa que un par de meses despois prendérono no aeroporto de Barcelona acusado de evasión fiscal nos EE.UU.
Os últimos meses McAfee estaba na prisión de Brians 2 á espera da súa extradición, e cando parecía que era inevitable que tivese que responder polos seus delitos fiscais cometidos entre 2016 e 2018 en virtude da decisión da Audiencia Nacional de extraditar a EE.UU. ao recluso, John McAfee apareceu morto na súa cela, apuntando todo a que podería tratarse dun suicidio.
McAfee chegou a denunciar no pasado ameazas de morte de oficiais estadounidenses nas que daban a entender que simularían un suicidio, pero por outra banda nos últimos días recoñecía ter os seus activos incautados, o que provocou que os seus amigos desaparecesen, de xeito que agora non tiña nada, pero tampouco se arrepentía de nada, do que podemos deducir que non estaba a pasar por un bo momento, e as súas perspectivas de futuro eran peores (aseguraba que as penitenciarías españolas eran hoteis de luxo comparados coas prisións estadounidenses).
Remata así a historia dunha figura relevante do sector tecnolóxico que será lembrada máis pola súa vida sen control que polo seu rol pioneiro no mundo da seguridade informática.