El Corte Inglés estrea OMV con tarifas pouco atractivas

No mes de marzo El Corte Inglés asinou un acordo co Grupo MásMóvil para lanzar un operador virtual de móbil e fibra, Sweno, que por fin é unha realidade, cunha oferta de servizos que non parece especialmente competitivo e que como principal reclamo ten a confianza que os consumidores poidan ter nunha compañía consolidada, que ofrece uns paquetes de produtos sinxelos e aproveita a súa ampla rede de puntos de venda para achegarse ao consumidor.
A contratación de Sweno emprega como promocións descontos ao contratar fibra, fixo e móbil ou ao adquirir algún novo dispositivo electrónico en El Corte Inglés, ofrecendo tamén moitas das súas tarifas un 20% de desconto durante os primeiros 6 meses.
Como exemplo das tarifas de Sweno temos que unha conexión de fibra de 300 Mbps xunto cunha liña móbil con chamadas ilimitadas e 20 GB de datos custa 54 euros/mes; unha liña móbil con chamadas e datos ilimitados custaría 30 euros/mes; e unha conexión de fibra de 300 Mbps con fixo con chamadas ilimitadas a fixos (e 60 minutos de chamadas a móbiles) custaría 37 euros/mes; prezos que de xeito xeral serían máis caros que os de outros OMV.
Tamén ofrecen a posibilidade de contratar un servizo de SICOR Alarmas, pero sorprendentemente o prezo de tal oferta é o mesmo que a que ten o público xeral, dando a impresión de que o único reclamo que ten esta compañía é a aglutinación de servizos baixo unha única factura (vantaxe máis que discutible).