Houseparty pechará en outubro

Durante o confinamento emerxeron numerosas plataformas de vídeo en grupo á vez que servizos anteriores conseguían un pulo inesperado, pero o mercado non é capaz de absorber tanta competencia e a demanda destas ferramentas tamén baixou considerablemente ao recuperarse a liberdade de movemento, polo que non debería sorprendernos que unha das aplicacións máis imitadas xunto con Zoom, Houseparty, anuncie que dirá adeus en outubro.
Esta plataforma de vídeo en grupo naceu en 2016 e pasou logo a incorporarse a Epic Games, o que serviu, entre outras cousas, para que estrearan un modo de retransmisión de partidas de Fortnite dentro das xuntanzas grupais, pero os responsables da plataforma recoñecen que están a traballar máis en desenvolver tecnoloxía para Fortnite que para a súa propia aplicación, polo que optan polo seu peche ante a imposibilidade de prestarlle atención.
Podemos entender que coa compra de Houseparty Epic simplemente adquiriu talento (sen ter un interese real na aplicación) ou que Houseparty non foi capaz de medrar para poder manterse como unha plataforma competitiva, pero en calquera caso no mes de outubro pecharanse os seus servidores, polo que deixará de funcionar para sempre.