O poeta Jorge Moral lanza unha serie de podcasts para achegar a figura de Florencio Delgado ás novas xeracións

O poeta valdeorrés Jorge Moral compartiu detalles dun proxecto tecnolóxico-cultural que pon en valor a figura de Florencio Delgado Gurriarán, o escritor homenaxeado este ano no Día das Letras Galegas, amais de achegalo, a través de innovadores formatos de comunicación, ás novas xeracións. Estamos a falar do proxecto As Letras de Florencio, dende o que se publicará este domingo 30 de xaneiro o primeiro dunha serie de podcasts sobre a vida e a obra do escritor de Córgomo. Esta iniciativa conta co impulso de varios concellos da comarca de Valdeorras e co apoio da Deputación de Ourense e da Xunta de Galicia.
Doce capítulos
As letras de Florencio: o podcast son doce capítulos que serán publicados no último domingo de mes durante o 2022. O formato é unha creación do escritor e activista cultural valdeorrés Jorge Moral, quen no primeiro capítulo, Do que non se fala, pouco se sabe, ofrece unha cartografía persoal sobre o poeta abranguendo todas as facetas da súa contribución: a humana, a política e a literaria. Tamén terá unha colaboración do historiador Ricardo Gurriarán, e a intervención de Eilún del Pazo, poeta gañadora da terceira edición do Premio de Poesía Florencio Delgado Gurriarán.

O propio Jorge Moral foi o gañador da primeira edición deste concurso cando tiña dezaoito anos e dende entón, como el mesmo indica, a súa relación con Florencio e a reivindicación da súa figura “non fixo máis que crecer”.
Dende Utrecht, onde se atopa cunha estancia Erasmus, asegura que desexa que este podcast contribúa a crear un discurso colectivo sobre Florencio: “Hai bastante investigación formal sobre o autor pero falta divulgación, facer a súa obra e traxectoria máis accesibles, sobre todo para a xente nova, afeita a que se nos conte a cultura cuns códigos que non son os nosos”. Segundo indica, “a acción cultural e política de Florencio están moi vixentes”.
Os podcast subiranse á Spotify e Ivoox e poranse a disposición de plataformas de audio en liña e radios para a súa emisión. Tamén estarán na web As Letras de Florencio e nas redes sociais do proxecto, onde se irán anunciando tódalas actividades e publicacións relacionadas co autor durante este 2022.