A fibra de Adamo chegará a máis de 1.100 vivendas de Castro de Rei antes de que remate o ano

A fibra óptica de Adamo achegará conexión a 1.116 domicilios de Castro de Rei desde abril ata finais de ano. A operadora deu a coñecer que esta despregadura no concello lucense é un “fito histórico nas comunicacións do municipio”, xa que estamos a falar dunha poboación qu rolda os 5.000 habitantes. A cifra é aínda máis destacada se temos en conta que o número de domicilios é sempre menor có de habitantes. Así o explicou David Llano, responsable do operador en Galicia, nunha sesión informativa celebrada na praza Maior da localidade o venres pasado, onde deu a coñecer o plan da empresa para dotar a Castro de Rei do sinal de Internet “máis rápido do mercado, de 1.000 Mb, que Adamo proporciona e que ningunha outra compañía mellora”, dixo.
Esa potencia, engadiu, “permite estar máis preto dos seres queridos que se atopan lonxe, teletraballar con garantías, pasar citas médicas en remoto, acceder a educación en liña, comprar por Internet ou gozar de videoxogos, películas e series a través da Rede”.
Nun proceso con varias fases, o operador pulsará o botón de aceso nas primeiras vivendas de Castro de Rei nos vindeiros, ao longo do mes de abril, empezando pola parroquia de Ribeiras de Lea. Unha vez se chege aos 1.116 fogares citados ao concluír 2022, Adamo cumpriría co compromiso adquirido co Ministerio de Asuntos Económicos e Transformación Dixital.
Partindo dese mínimo, con todo, é intención dos responsables da empresa instalar fibra de 1.000 Mb no resto de parroquias a través de investimentos propios, “sempre que se dea unha demanda en tal sentido entre os veciños”, apunta a compañía. Aquelas persoas interesadas en ter Internet ultrarrápido no concello poden apuntarse no grupo da web de Adamo específica de Castro de Rei.
O despregamento en Castro de Rei, que conta co respaldo e o seguimento do seu alcalde, Francisco Javier Balado, enmárcase no exhaustivo plan de expansión que a compañía está a desenvolver na provincia de Lugo, que incluíu a instalación de fibra en máis de 65.000 domicilios entre 2018 e 2021. A eles sumaranse outros 14.000 durante 2022 para redondear un total próximo aos 80.000 fogares na rede de Adamo.