Os Kindle xa poden recibir documentos EPUB por correo electrónico

Os lectores de libros electrónicos de Amazon non só permiten a visualización de contidos adquiridos na tenda en liña da compañía de Jeff Bezos, senón que tamén facilitan a reprodución de contidos na biblioteca Kindle dos usuarios nunha serie de formatos que van dende os textos de Word ata os documentos en PDF, pasando por imaxes JPEG, pero deixando fóra un formato tan popular como o EPUB, o que forzaba aos usuarios a empregar ferramentas como Calibre para converter os seus libros electrónicos a un formato compatible con Kindle como MOBI, o que a finais de ano vai mudar, xa que o servizo de documentos persoais de Kindle, ante a antigüidade do formato MOBI, decidiu retirar o seu soporte (aínda que os documentos existentes no formato non continuarán a estar dispoñibles).
Pero o abandono do soporte de MOBI no sistema de envío de documentos persoais aos Kindle resulta ser unha nova moi boa, xa que para compensar tal eiva decidiron incorporar a compatibilidade con EPUB, de xeito que o formato de libros electrónicos máis popular é finalmente compatible co servizo de documentos persoais de Kindle, o que permite cargar os libros electrónicos no lector dun xeito moi cómodo: enviándoos por correo electrónico.
Dende o sistema de soporte de Amazon indican que esta novidade chegará a partir de finais de 2022, aínda que xa está operativo, simplificando a vida aos usuarios, que non terán que transformar os documentos que desexen cargar no seu lector de libros electrónicos sempre que estean en formato TXT, RTF, Word, PDF, HTML, EPUB ou en formato gráfico (JPEG, GIF, PNG e BMP), pasando a estar obsoleto o formato MOBI (recoñecible polas extensións .mobi e .azw).