Medio cento de persoas participarán este venres na xornada de presentación da 3ª edición de Talentos Inclusivos

A Sala Leonardo da Domus da Coruña vai acoller este venres 4 de novembro a xornada de presentación da terceira edición do proxecto Talentos Inclusivos, impulsado polo CITIC da UDC e ASPACE Coruña para “fomentar vocacions científicas e tecnolóxicas entre o alumnado de Secundaria e Bacharelato e, á vez, dar visibilidade á diversidade funcional”. A xornada de presentación xuntará medio cento de persoas na Domus, entre estudantes, docentes, integrantes de ASPACE, investigadores e autoridades locais, autonómicas e estatais.
“Facilitar a integración tecnolóxica e social a través das TIC entre persoas con diversidade funcional” é o cometido principal do programa Talentos Inclusivos, promovido polo Centro de Investigación en Tecnoloxías da Información e as Comunicacións (CITIC) da UDC e a Asociación de Pais de Persoas con Parálise Cerebral (ASPACE) Coruña.
Como dixemos, Talentos Inclusivos está orientado ao desenvolvemento, por parte de alumnado de Secundaria e Bacharelato, de solucións TIC (Tecnoloxías da Información e a Comunicación) para persoas con diversidade funcional. Ata o momento participaron 11 centros educativos e 280 estudantes da provincia da Coruña.
Promovido polo CITIC e ASPACE Coruña, conta ademais co apoio do Consello Social da Universidade da Coruña, o Concello da Coruña, a FECYT do Ministerio de Ciencia e Innovación e a Xunta de Galicia.
O proxecto ten como se dixo o duplo obxectivo de fomentar as vocacións TIC entre o alumnado e, á súa vez, dar visibilidade á diversidade funcional. Para iso, en cada edición, créanse grupos de traballo colaborativos formados por usuarios e usuarias de ASPACE Coruña e estudantes de centros educativos da provincia, apoiados polo seu profesorado e persoal investigador do CITIC. Os/as usuarios/as de ASPACE Coruña propoñen diferentes retos tecnolóxicos, atendendo ás necesidades prioritarias que eles detectan, para ser solucionados por parte do alumnado.
Produtos de apoio con impresión 3D, acceso ao computador e ao móbil, comunicación, fogar intelixente, rehabilitación e ocio son as áreas de traballo nas que os alumnos desenvolverán ferramentas e solucións TIC concretas.
Premios
Ao longo da súa traxectoria, Talentos Inclusivos leva recibidos diferentes recoñecementos polo alcance, dimensión e obxectivos do proxecto. Destacan os concedidos polo CPEIG á Innovación Tecnolóxica no Ensino e pola Deputación da Coruña ás Boas Prácticas en Servizos Sociais, entre outros.