Lugo habilita 12 espazos no CEI Nodus para impulsar empresas de alicerce tecnolóxico

O Concello de Lugo puxo a disposición dos emprendedores e emprendedoras lucenses 12 espazos no Centro de Empresas e Innovación (CEI-Nodus) para impulsar novos negocios innovadores na cidade e apoiar o emprendemento local. “Actualmente contamos cunha ducia de espazos dispoñibles, adaptables ás necesidades de cada emprendedor e de cada actividade”, explicou a rexedora Lara Méndez durante unha visita a estas instalacións municipais, na que estivo acompañada pola edil de Desenvolvemento Local e Emprego, Ana Abelleira.
Entre os criterios que se avaliarán para a súa adxudicación figuran “a solvencia técnica e económica do proxecto”, “o grao de innovación e compoñente tecnolóxico”, así como “o potencial de xeración de emprego, a repercusión da iniciativa e a súa contribución ao desenvolvemento socioeconómico da cidade”.
En concreto, atópanse dispoñibles nove despachos situados no primeiro e segundo andar, de entre 32 e 64 metros cadrados; un laboratorio, de 104 metros cadrados, situado no andar baixo; e dous talleres, de 62 e 93 metros cadrados, emprazados tamén no andar baixo. A maiores, neste intre, ata cinco empresas poden madurar a súa idea de negocio e traballar sobre o seu proxecto no sementeiro de empresas do que tamén dispón o CEI.
O Concello cede estes espazos por un período máximo de catro anos. O prezo varía entre os 63 euros anuais, durante o primeiro ano, no caso dos despachos, ata os 157 euros no caso do laboratorio. Estas contías increméntase cada anualidade, acadando un prezo máximo, no cuarto ano, de 179 euros para os despachos e de 399 para o laboratorio.
A rexedora destacou que se trata de alugueres “moi por debaixo do prezo de mercado”, e salientou a iniciativa do Concello de exonerar do prezo público “ás empresas cualificadas como Iniciativas de Emprego de Base tecnolóxica (IEBT) durante 12 meses, con posibilidade de prorrogalos por outros 12 meses máis, no caso de incorporación de persoal técnico”.