390 millóns de euros de sanción para Meta por infrinxir a GDPR

A Comisión de Protección de Datos de Irlanda anunciou hoxe a conclusión de dous procedementos abertos contra Meta Platform Ireland Limited relativos aos servizos de Facebook e Instagram por incumprir co Regulamento Xeral de Protección de Datos (GDPR), o que suporá a Meta unha sanción de 210 millóns de euros polas infraccións de Facebook e outros 180 millóns de euros polas infraccións de Instagram, á vez que esíxese a Meta que corrixa a situación para cumprir coa lexislación europea nun prazo de 3 meses.
Ambas infraccións teñen a mesma esencia, e as sancións parten de queixas presentadas dende Austria (en relación a Facebook) e Bélxica (en relación a Instagram) o 25 de maio de 2018, cando entrou en vigor a GPDR. Xusto de cara a tal data Facebook e Instagram mudaron as súas condicións de uso, obrigando aos usuarios a aceptalas para poder empregar ambas plataformas, o que podería parecer un bo proceder se non fose porque as condicións incluían a aceptación do uso de datos persoais para recibir publicidade personalizada, algo que debería ser opcional e non forzoso, de aí que dende Irlanda consideran que Meta incumpriu a GDPR. A Comisión tamén considera que os cambios na normativa de Meta non foron transparentes, ou sexa, que os cambios non resultaban claros para os usuarios.