Quobis Networks consolídase no mercado latinoamericano co apoio de Galicia Avanza

A empresa galega Quobis Networkis, referencial firma tecnolóxica do Porriño (con 17 anos de traxectoria e centrada en servizos de integración, solucións propias e soporte técnico de redes a operadoras e grandes empresas), compartiu novos detalles dos seus recentes logros en materia de novos mercados, un proceso que se apoiou en parte en Galicia Avanza, programa de internacionalización de pemes tecnolóxicas e innovadoras galegas impulsado pola Xunta (a través de GAIN e o IGAPE) e a Tecnópole (Parque Tecnolóxico de Galicia). Boa parte desta información foi avanzada pola empresa durante a visita ás súas instalacións de Patricia Argerey, directora de GAIN.
Quobis, que conta cun persoal de 45 profesionais, acadou en 2022 unha facturación de 4,3 millóns de euros, dos cales o 70% proviña do mercado nacional e o 30% restante do exterior.
Como dixemos, foi unha das empresas beneficiarias de Galicia Avanza e durante o seu paso polo programa, recibiu asesoría e apoio para incrementar a presenza internacional da súa plataforma Quobis Communication Platform en países de Latinoamérica como México e Colombia. Trátase dunha plataforma baseada en tecnoloxía WebRTC que permite a operadoras e grandes empresas soportar múltiples casos personalizados, achegando capacidades multimedia de última xeración ás redes de voz existentes.
Ademais da parte formativa, a participación en Galicia Avanza comprendeu unha serie de accións orientadas a gañar presenza na outra beira do Atlántico que se materializou por unha banda na participación nun evento sectorial en Miami para a localización de partners e, pola outra, na realización dun estudo de mercado para coñecer o grao de implantación das solucións tecnolóxicas no territorio.