Fernando Suárez e Antonio Rial, no comité estatal de expertos para a creación dunha Rede segura para os menores

Fernando Suárez, presidente do Colexio Profesional de Enxeñaría en Informática de Galicia (CPEIG) e Antonio Rial Boubeta, profesor da Facultade de Psicoloxía da Universidade de Santiago e experto en adiccións xuvenís e membro do Alto Comisionado da UNESCO para a loita contra o acoso escolar e o ciberacoso, foron escollidos polo Goberno para entrar a formar parte do comité de expertos establecido para deseñar unha estratexia de país que promova un contorno dixital seguro para as nenas, nenos e adolescentes.
Antonio Rial Boubeta e Fernando Suárez Lorenzo son os dous únicos representantes galegos no comité de expertos.

A creación do equipo de traballo foi aprobada os días pasados polo Consello de Ministros, que estableceu que a súa función será a de “deseñar unha estratexia nacional destinada a fomentar unha contorna dixital segura dirixido especificamente á poboación infantil e adolescente”.
A base de traballo do comité virá con tres piares fundamentais: a necesidade de aprobar unha lexislación integral para a protección de menores na Internet; a urxencia por impulsar unha estratexia de enfoque multidisciplinario desde a educación, “xa que a prevención e a formación desempeñan un papel crucial no fomento dunha contorna dixital segura”; a promoción de avances no desenvolvemento de solucións tecnolóxicas destinadas a impedir o acceso de menores de idade a contidos para adultos.
En definitiva, o obxectivo deste comité consiste en “alcanzar un acordo interxeracional a nivel nacional que posibilite que nenas, nenos e adolescentes gocen dos beneficios da tecnoloxía, garantindo unha navegación segura na Rede, dando prioridade á defensa dos seus dereitos e brindándolles a oportunidade de participar na toma de decisións”.