A dobraxe automática mediante IA chega a centos de milleiros de canles de YouTube

YouTube leva bastantes meses experimentando coa dobraxe de vídeos mediante intelixencia artificial en varios idiomas e, aínda que inicialmente limitaba esta posibilidade a unhas poucas canles escollidas, agora anuncian a dobraxe automática como unha característica máis de YouTube.
YouTube está a abrir a tecnoloxía de dobraxe (nacida no proxecto Aloud) a centos de milleiros de canles no programa YouTube Partner que se enfoquen na divulgación e na información (aínda que ampliarase a outros tipos de contido en breve) de aí que agora sexa relativamente frecuente que atopemos contidos dobrados ao español pese a terse gravado orixinalmente noutras linguas.
Para poder empregar esta nova funcionalidade, cando subamos un novo vídeo a YouTube o sistema detectará o seu idioma e creará dobraxes noutras linguas, ampliando así o seu alcance. Os creadores poden acudir ao YouTube Studio para poder controlar as dobraxes na sección de idiomas, facilitando así o borrado de dobraxes no caso de que non guste o seu resultado.
Estamos ante unha tecnoloxía que aínda non está moi madura, polo que non está carente de erros, e actualmente, ao subirmos un vídeo en inglés, este dobrarase automaticamente a francés, alemán, idioma hindi, indonesio, italiano, xaponés, portugués e español, mentres que de estar noutro idioma a dobraxe realizarase unicamente ao inglés.
Como acontece cos subtítulos, cando unha dobraxe se crea de xeito automático, destacarase como tal no selector de pistas de audio, destacándose cal é a pista sonora orixinal, e respectándose as preferencias de reprodución do usuario no futuro.
Dende YouTube están a traballar na mellora desta tecnoloxía para que as dobraxes resulten máis precisas, expresivas e naturais, procurando imitar o ton, a emoción e incluso o son de ambiente, facendo que as dobraxes sexan cada vez de maior calidade.