Por se había algunha dúbida sobre o firme que é a decisión de deixar de fabricar discos Blu-ray de xogos de PlayStation 5 a partir de xaneiro de 2028, hai usuarios dando conta da chegada ás tendas de unidades de consolas nas que pode lerse na súa caixa un aviso importante no que aseguran que «a partir de xaneiro de 2028, os novos lanzamentos de xogos para PlayStation estarán dispoñibles para a súa compra na PlayStation Store e a través de minoristas unicamente en formato dixital. Os discos de xogos lanzados antes de xaneiro de 2028 seguirán sendo compatibles con esta consola».
Entendemos que a advertencia busca protexer a Sony de posibles demandas no futuro, ante usuarios que poderían sentirse enganados de adquirir unha consola con lector de discos se precisamente a intención do fabricante é deixar de comercializar os xogos en disco.
Estas mensaxes de advertencia, aínda que están a ser novidade en tendas físicas, xa estaban presentes na tenda en liña de PlayStation, que achega o mesmo aviso tanto ao mercar unha consola con lector de discos como na ficha do lector de discos solto.
Estes avisos importantes sumaríanse ás propias declaracións da directora financeira de Sony, Lin Tao, quen xustificou o abandono dos xogos en disco durante a última presentación de resultados da compañía, deixando caer que non se trata dunha política que se aplique só aos videoxogos, senón que atendería a todo tipo de contidos.
