A Deputación da Coruña presenta a nova versión da súa app Conta Doada

A Deputación da Coruña convocou para os vindeiros 29 de setembro e 6 de outubro dous cursos de formación sobre as novidades da versión 2017 de Conta Doada, que é como se coñece a aplicación informática desenvolvida pola institución provincial hai oito anos para facilitar a contabilidade das asociacións e entidades. A actividade formativo-divulgativa, de catro horas de duración, permitirá aos participantes aprender a utilizar o programa para comezar a traballar con el, ou mellorar o seu manexo para tirar proveito das novas ferramentas dispoñibles.
Segundo informa a Deputación, entre as novidades máis salientables da versión máis recente áchanse un xestor documental e máis unha aplicación de facturación, ademais de control de tesourería e opción de traballar en galego ou en castelán.
Este programa, que a área de Economía e Facenda da Deputación permite descargar de maneira libre e de balde, foi desenvolvido de maneira específica “para facilitar a contabilidade e a documentación da xestión económica das entidades, unha obriga para aquelas asociacións que reciben fondos públicos”, explica a entidade provincial, engadindo que a ferramenta “supón un importante aforro de custos e tempo no traballo diario e permite acadar maiores niveis de transparencia e seguridade xurídica, tanto nas relacións entre as entidades e a administración, coma entre os responsables de cada entidade e os seus membros”.