Case medio centenar de empresas dos polígonos de Lalín e Meaño contan xa con Internet de ata 350 Mbps

Proseguen os traballos do Plan de Banda Larga da Xunta para introducir redes ultrarrápidas nos polígonos que non contan con elas. Entre os espazos industriais onde se veñen de estrear estes equipamentos de FTTH (Fiber To The Home) figuran os de Lalín e Meaño, o que significa que un total de 47 empresas dispoñen xa de acceso a Internet con velocidades de ata 350 Mbps: un total de 17 firmas no de Botos, en Lalín, e 30 no da Pedreira, en Meaño.
Alén dos de Lalín e Meaño, a comunidade de “polígonos FTTH” da provincia de Pontevedra incrementouse este ano cos complexos industriais de Tremoedo (Vilanova de Arousa) e A Portela (Cangas). A estes 4 uniránselles en datas os vindeiras os polígonos de Agolada, Ribadil (A Cañiza), Afieiras e Mirallos (Moraña) e Chan da Ponte (Salvaterra do Miño), que acubillan, entre todos eles, arredor dun centenar de empresas. Con estes e outros datos, ao peche deste ano a comunidade de parques industriais da provincia beneficiados polo dito Plan (dende o seu inicio en 2016) estará integrada por 28.
Os polígonos acabados de beneficiar, incluídas as 47 empresas das áreas de negocios de Lalín e Meaño, poden contratar servizos de Internet a través de fibra óptica cunhas velocidades de ata 350 Mbps de baixada e 35 de suba, e cunha garantía de caudal do 80% sen límite de descargas.
Prazos e orzamento
O Plan xa completou o despregue en 68 polígonos da Comunidade e este ano chegará a outros 13 máis. Deste xeito, en 2018, un total de 130 polígonos, que concentran case o 93% da superficie empresarial ocupada, disporán de acceso a redes de máis de 100 Mbps. Estes despregues supoñen un investimento total de 5,2 millóns de euros, dos que 3,4 son subvencionados pola AMTEGA e co-financiados ao 75% polo Fondo Europeo Agrícola de Desenvolvemento Rural (FEADER) no marco do Plan de Desenvolvemento Rural de Galicia 2014-2020 (PDR).