A Deputación de Lugo impulsará unha web sobre a Cova de Eirós

A Deputación de Lugo vai impulsar con financiamento de seu a creación dunha páxina web sobre a Cova de Eirós, no concello de Triacastela, amais dun catálogo e diversas guías para dar a coñecer este xacemento de gran valor xeolóxico e, tamén, histórico e etnográfico. Estes proxectos foron presentados hoxe polo presidente da entidade provincial, Darío Campos Conde, quen lembrou que a Deputación puxo a disposición do Concello de Triacastela unha contía de 31.000 euros. Con este investimento levaranse a cabo das ditas accións comunicativas e farase o proxecto museolóxico para pór en valor a Cova de Eirós.
Campos Conde sinalou que “con este novo proxecto impúlsase este enclave excepcional, xa que é a única cova de Galicia con evidencias de ocupación de Homo Neardenthalis e Homo Sapiens na Península Ibérica, ademais é un dos xacementos paleontolóxicos mais importante de Europa para o estudo do oso das cavernas, e tamén é onde se atopan as primeiras descubertas de arte rupestre paleolítico no norte peninsular”.
O presidente engadiu “que a creación deste museo é unha vella demanda dos veciños de Triacastela, xa que reclamaban un espazo onde coñecer in situ os achados que se realizan nas campañas de escavacións da cova, coas que tamén colaborou o Goberno da Deputación”.