AMTEGA e Gartner inician unha colaboración estratéxica

Este 28 de febreiro celebrouse en Santiago un encontro-debate arredor do futuro tecnolóxico inmediato: a Xornada de Innovación e Tendencias Tecnolóxicas, organizada polo Colexio Profesional de Enxeñaría en Informática de Galicia (CPEIG), Abanca, AMTEGA (Axencia para a Modernización Tecnolóxica de Galicia) e a consultora Gartner. Precisamente, a xornada enmarcou a presentación dunha iniciativa conxunta entre AMTEGA e Gartner: o inicio dunha colaboración estratéxica para achegar as tecnoloxías disruptivas (as que marcan un antes e un despois na liña do progreso e dos avances innovadores) ao ecosistema dixital galego.
O acordo, presentado pola directora da axencia autonómica, Mar Pereira, facilitará o acceso a contidos elaborados por expertos de primeiro nivel en tecnoloxía que esta consultora internacional ten ao redor do mundo. Pereira apuntou tamén que a axencia contará co asesoramento especializado de Gartner na elaboración da futura estratexia dixital post 2020.
Por outra banda, a directora da AMTEGA (que foi a encargada de clausurar a xuntanza) destacou a importancia que “o actual Goberno galego lle dá á tecnoloxía como elemento transversal cun departamento baixo a tutela directa da Presidencia, unha axencia concibida para sumar esforzos de cara a transformación dixital da Comunidade”.
Na cita de hoxe participaron uns 120 representantes das principais organizacións tecnolóxicas e empresariais de Galicia. Celebrouse no Centro Obra Social Abanca no 19 da praza de Cervantes co obxectivo de “enriquecer o ecosistema tecnolóxico e dixital de Galicia”.