O Concello visita o obradoiro AtriumTIC, que dixitaliza a historia de Lugo

O Concello de Lugo está a dixitalizar unha parte importante do seu patrimonio documental. Este labor recaeu en mans do alumnado do obradoiro AtriumTIC que desenvolve o Centro de Emprendemento municipal. Até o de gora, xa dixitalizaron máis de 70.000 arquivos dos libros de actas do Concello de Lugo do século XVIII e máis de 65.000 expedientes do cemiterio municipal e do servizo de estatística. Os participantes no obradoiro recibiron hoxe a visita da alcaldesa de Lugo, Lara Méndez.
A rexedora, acompañada polo concelleiro de Desenvolvemento Local e Emprego, Mauricio Repetto, interesouse pola natureza dos traballos despregados polos 16 mozos e mozas, desempregados de 16 a 29 anos de idade, que se están a formar en preservación e dispoñibilidade de arquivos a través das máis avanzadas tecnoloxías de tratamento de documentos.
Docentes e alumnado comentaron o coidado co que manexan a documentación, especialmente a máis antiga, xa que as actas consistoriais, do fondo histórico do Concello de Lugo, datan dos anos 1728 a 1800.
Méndez salientou a relevancia de aplicar a estender o uso das Tecnoloxías da Información e a Comunicación nos procesos de xestión documental, ao abeiro marco dos traballos de transformación da administración local cara a unha eAdministración. “A finalidade é preservar e xestionar ditos fondos para axilizar o acceso á documentación, alcanzando procesos de traballo máis eficientes e cun menor custo”, explicoulle aos alumnos. Por iso, dixo, “este tipo de accións son boas para nós, e para vós, porque este traballo non só vos axuda na vosa formación e empregabilidade senón que tamén vos servirá como carta de presentación”.