As investigadoras mostran ao alumnado da USC como actuar ante casos de ciberacoso

Co gallo do do Día Internacional da Internet Segura 2020, a Facultade de Ciencias da Educación acolleu un foro para sensibilizar ao alumnado na necesidade de fomentar, a título individual e colectivo, unha Sociedade da Información inclusiva, respectuosa, confiable e protexida. A primeira edición da Xornada de educación na cidadanía dixital responsable contou coa presenza de expertas en ciberseguridade, que compartiron os seus coñecementos co alumnado, convidándoo a aplicar medidas que garantan unha Internet mellor para todas a todos. A cita desenvolveuse baixo o seguinte epígrafe: Unha Internet mellor comeza hoxe contigo: asumindo o desafío educativo.
Ademais de Jose María Lozoya Pérez, cibercooperante do Instituto Nacional de Ciberseguridade (INCIBE), quen centrou a súa intervención na análise dos desafíos que implica o uso seguro e positivo das tecnoloxías dixitais, o foro contou coa presenza do profesor José Julio Fernández Rodríguez, director do Centro de Estudos de Seguridade da USC, relatorio no que se salientou a necesidade de ter presente o vínculo entre a protección de datos e a dignidade das persoas.
De seguido, Marta Andrade Blanco, representando a UNICEF, expuxo algúns dos datos derivados dos estudos realizados dende a entidade sobre o uso das novas tecnoloxías na nenez e a adolescencia, centrándose nos factores de risco e protección.
O peche correu a cargo de catro investigadoras do Grupo Esculca (Diana Priegue, Leticia López-Castro, Cristina Varela e Laura García), que desenvolveron un obradoiro que xirou arredor das mellores metodoloxías para atallar un problema de ciberaocoso dende o ámbito pedagóxico, pondo o foco na necesidade de traballar tanto cos mozos e mozas, como coas familias, “sen esquecer a pertinencia de contar co apoio e colaboración dos profesionais dos centros educativos”.
Esta actividade estivo organizada dende o Grupo de Investigación Esculca, en colaboración co Centro de Estudos de Seguridade, o Instituto Nacional de Ciberseguridade (INCIBE), e UNICEF; baixo a dirección de Diana Priegue e Leticia López-Castro.