Goberno, Xunta e Forzas Armadas inauguran UNVEX Live

A Secretaría Xeral de Transportes e Mobilidade (Ministerio de Transportes, Mobilidade e Axenda Urbana), a Xunta de Galicia e a Dirección Xeral de Armamento e Material (Ministerio de Defensa) inauguraron a vertente virtual da sexta edición do congreso UNVEX, un evento centrado na puxante industria aeronáutica estatal, poñendo o foco no máis que relevante caso galego (a través, por exemplo, do Polo Aeronáutico das Rozas, en Lugo, e do Civil UAV Iniative que este acubilla). Na apertura do evento convidouse aos profesionais do sector a participar en UNVEX Live (inaugurada polas ditas entidades) e a asistir á cita presencial do 2 ao 4 de marzo de 2021 en Santiago de Compostela. Por certo que a vertente virtual do evento estará activa ata o 1 de marzo.
UNVEX Live arrincou ante máis de 200 profesionais do sector e coa participación do vicepresidente segundo da Xunta e conselleiro de Economía, Empresa e Innovación, Francisco Conde, a secretaria xeral de Transportes, María José Rallo del Olmo, e o subdirector xeral de Programas da DGAM, xeneral de división Salvador Álvarez.
Francisco Conde destacou que UNVEX é o “maior escaparate do sector a nivel nacional” e resaltou o traballo que se está a facer en Galicia para impulsar este sector, especialmente desde o Polo Aeronáutico de Galicia, situado no aeródromo de Rozas (Lugo), e que entra en 2021 nun novo treito de financiamento. Trátase, dixo, “dunha iniciativa que conta con 160 millóns de euros destinados á innovación en sector, á cal presentáronse xa 152 proxectos de 67 entidades diferentes nacionais e internacionais”. Segundo adiantou, os seus primeiros resultados poderanse ver na cita presencial de Santiago de Compostela en marzo de 2021.
Pola súa banda, a secretaria xeral de Transportes quixo destacar o papel dos UAS na nova estratexia de mobilidade urbana sustentable, segura e conectada que está a deseñar o seu departamento e que se atopa en fase de consulta pública, así como o impulso de proxectos pilotos. Salientou tamén o U-Space, que denominou como “verdadeira panca de cambio do sector” e que permitirá, dixo, “a creación dun centro de excelencia de desenvolvemento e identificación de estratexias de I+D”.
No ámbito da Defensa, o xeneral Salvador Álvarez resaltou a importancia dos RPA nos conflitos actuais e que “sen eles non é factible a plena operatividade das Forzas Armadas”. Sinalou que o Ministerio de Defensa traballa para manter a independencia nacional en materia industrial e tecnolóxica e que mantén unha estreita colaboración con Europa para o desenvolvemento do Euromale.
As tres institucións coinciden na importancia de potenciar o sector dos UAS como “un sector tecnolóxico xerador de innovación e talento onde a colaboración de todas as administracións faise patente, así como a vital importancia destes sistemas nas estratexias de defensa e nos servizos que a Administración proporciona ao cidadán”.
A inauguración celebrada de UNVEX Live pódese ver enteira a través de Youtube.