Medra a cifra de fogares e empresas de Padrón con cobertura de fibra óptica de R

A operadora galega R aumentou a cifra de fogares e negocios do concello coruñés de Padrón con posibilidade de conectarse á súa fibra óptica FTTH (polas súas siglas en inglés, fibra ata o fogar). Asi, os núcleos da Romarís, Vilar e Escravitude xa dispoñen de accesos ultrarrápidos a Internet de ata 500 Mbps e poden desfrutar doutros servizos avanzados de telecomunicacións grazas ás redes de nova xeración de R. O despregue destes equipamentos levouse a cabo “aproveitando ao máximo as infraestruturas destes lugares”.
O devandito tradúcese en 111 novos fogares e negocios das ditas localizacións do concello de Padrón preparados para recibir os servizos avanzados de teléfono, Internet de ata 500 Mbps simétricos e televisión dixital multicanle de R.
A estes 111 sumaranse outros 83 ao remate de novembro.
Segundo informou a operadora, tralo exercicio de 2021 (coa finalización do despregue en Padrón do Plan Avanza) estaremos a falar de 715 novas residencias particulares padronesas conectadas ás súas redes de última xeración.
A compañía lembra que leva anos investindo no fornecemento de rede no dito concello coruñés, alén do Plan Avanza. Así, a día de hoxe xa dispoñen da cobertura das redes de nova xeración de R un total de 827 fogares e empresas de Padrón.
Estas e outras actuacións na provincia da Coruña forman parte dun dos tres proxectos do Plan PEBA-Avanza do Ministerio de Economía e Empresa dos que R resultou adxudicataria en 2018 para despregar, antes de 2021, a tecnoloxía FTTH en 512 núcleos de Galicia que non dispoñan de alta velocidade ata o momento (“zonas brancas”).
No desenvolvemento dos tres plans investiranse un total de 10M€, dos cales preto de 8M€ serán subvencionados polos fondos FEDER da Unión Europea.
En concreto, o despregamento en Padrón encádrase no proxecto destinado á extensión de redes de nova xeración en 154 núcleos de municipios do noroeste de Galicia (A Coruña, norte de Pontevedra e oeste de Lugo). Para estas actuacións, cun investimento total de 2,6M€ destinarase unha axuda dos fondos FEDER de 2,09M€. Un segundo proxecto fala igualmente do fornecemento de banda larga de nova xeración con tecnoloxía FTTH, desta volta en 162 núcleos do centro-oeste de Galicia (norte de Pontevedra, sur da Coruña e oeste de Lugo). O investimento total neste caso é de 3,58M€, 2,86 deles subvencionados polos fondos FEDER da Unión Europea. O terceiro dos proxectos adxudicados desenvolverase en 196 núcleos doutros municipios do suroeste de Galicia (Pontevedra). A cobertura nestas zonas suporá un investimento total de 3,75M€, cunha subvención dos fondos FEDER de máis de 3M€.