O proxecto COVIDBENS, referente principal da futura plataforma de datos europea sobre augas residuais

Este luns 22 de marzo celebrouse un foro europeo para compartir experiencias arredor dos desafíos da COVID-19 e das principais propostas da comunidade investigadora do ámbito internacional para afrontalos. Trátase do encontro SARS-CoV-2 Monitoring employing Sewers. Designing the EU Sewer Sentinel System for SARS-CoV-2 (EUS4), organizado pola Comisión Europea. No marco desta experiencia, presentáronse os resultados do proxecto galego COVIDBENS, que foi cualificado como exemplo internacional para a detección de coronavirus a través das augas residuais.
No foro participou a investigadora do Grupo de Microbioloxía do Instituto de Investigación Biomédica da Coruña (INIBIC), Margarita Poza, que explicou os resultados do proxecto COVIDBENS (Monitorización de variantes do SARS-CoV-2 en augas residuais da Coruña), que lidera Poza e do que tamén forman parte os investigadores do CITIC (Centro de Investigación TIC da Universidade da Coruña) Susana Ladra e Ricardo Cao. O proxecto está financiado pola empresa pública EDAR Bens, que se encarga do servizo de depuración de augas residuais da área da Coruña.
COVIDBENS é o primeiro modelo epidemiolóxico baseado en augas residuais que se podería adaptar para rastrexar a evolución da pandemia en calquera parte do mundo, monitorizando tanto aos individuos sintomáticos como aos asintomáticos, anticipando varios días a evolución do COVID-19 na poboación implicada.
A Comisión Europea pretende que os estados membros analicen as augas residuais e compartan os datos nunha plataforma europea para obter información sobre a evolución do coronavirus. Así, o proxecto COVIDBENS serviu de exemplo a nivel internacional, facilitando que a Comisión Europea tomase esta decisión.
A investigadora principal, Margarita Poza, sinala que “este modelo axuda a comprender, cun alto grado de fiabilidade, a verdadeira magnitude da pandemia nun lugar e nun momento dado, podendo utilizarse como ferramenta eficaz de alerta temperá para predicir brotes”.
COVIDBENS é un proxecto multidisciplinar que inclúe persoal experto en diferentes materias, financiamento de EDAR Bens e participación do INIBIC, o CITIC, o CICA e o CITEEC. Segundo destacaron as entidades impulsoras da iniciativa, “COVIDBENS conseguiu ser un importante fito na investigación científica galega”.