O arqueólogo Ángel del Castillo incorpórase á enciclopedia online de biografías galegas do CCG

O Álbum de Galicia, a base de datos online do Consello da Cultura Galega sobre a historia da nosa terra a través dos nomes propios dalgúns dos seus grandes protagonistas, recibiu este mes de abril unha nova incorporación. Máis en detalle, a de Ángel del Castillo, pioneiro da arqueoloxía galega.
Ángel del Castillo (A Coruña, 1886-1961) foi un dos grandes investigadores do noso pasado, coñecedor in situ de todos os recantos da xeografía galega, cuxas pegadas históricas foron exhaustivamente documentadas no seu caderno e a través da súa cámara fotográfica. Co tempo, visitou, estudou e catalogou centos de monumentos, converténdose nun dos nosos arqueólogos e historiadores máis prestixiosos.
Álbum de Galicia
En xaneiro de 2020 o CCG presentou o Álbum de Galicia, unha colección dixital de biografías de persoas que destacaron en diversos ámbitos: desde a sociedade, a ciencia, a cultura ou a empresa. A idea foi “dar visibilidade e perspectiva de conxunto ás numerosas mulleres e homes, xa finados, que contribuíron de maneira significativa á sociedade galega ao longo da súa Historia. En moitos casos, seguen a ser grandes descoñecidos para o público de todas as idades, de dentro e de fóra do país”, en palabras do CCG.
As biografías do Álbum de Galicia están enriquecidas con material documental, referencias bibliográficas e contidos multimedia que permiten coñecer a obra das persoas divulgadas, pero tamén a produción intelectual existente sobre elas.
Ademais, permite explorar a presenza das persoas biografadas nos fondos documentais dixitalizados do Consello da Cultura Galega.
O Álbum de Galicia é o resultado da unificación das coleccións biográficas temáticas do CCG, que desde o ano 2005 teñen publicado álbums ao redor da muller, a ciencia ou a emigración, entre outros.