O 29 de xuño o CESGA ofrece un novo taller de usos do Finisterrae, en formato webinar

O Centro de Supercomputación de Galicia organiza o vindeiro martes 29 de xuño un obradoiro sobre as potencialidades do seu supercomputador Finisterrae, en horario de mañá (de 10.00 a 13.00 horas). O Taller Uso Finisterrae celebrarase con formato de webinar, en dúas quendas (martes 29 e mércores 30, co mesmo horario) no caso de que o número de asistentes exceda o límite de prazas fixado. O luns 28 de xuño enviaranse os detalles necesarios para a conexión aos asistentes.
A sesión está dirixida a usuarios noveis ou potenciais usuarios do computador Finisterrae, co obxectivo de que coñezan o equipo e aprendan a utilizalo para as súas propias aplicacións ou as que xa están dispoñibles. Respecto do programa específico de contidos, mostrarase por exemplo a arquitectura clúster do Finisterrae e farase un repaso pola nomenclatura e a descrición do hardware, previo paso a abordar cuestións como o sistema de colas ou as aplicacións das que se dispoñen.