Google non permitirá que as versións moi vellas de Android empreguen os seus servizos

Levamos anos comentando como os desenvolvedores de software van deixando de lado versións obsoletas dos sistemas operativos móbiles, avisando con bastante tempo para instar aos usuarios a renovar os seus terminais, de xeito que cada ano imos dando conta de, por exemplo, os móbiles nos que deixa de funcionar WhatsApp, e precisamente os terminais con Android 2.3.7 deixaron de funcionar cona ferramenta de comunicación o ano pasado, e agora é a propia Google a que abandona esta versión de Android principalmente como medida de seguridade, asegurando que a partir do 27 de setembro iniciarán o bloqueo de dispositivos con versións de Android tan vellas.
Deste xeito, quen teña aínda un trebello con Android 2.3.7 deixará de poder acceder a Gmail, a YouTube ou a Google Maps, o que para un usuario europeo é o máis semellante a deixar de ter un smartphone e pasar a ter un dispositivo que só serviría para realizar chamadas telefónicas e comunicarse mediante mensaxes de texto.
Dende Google advirten de que algúns dispositivos con Android 2.3.7 poden actualizarse a versións de Android superiores á 3.0, polo que deberían actualizar canto antes para evitar perder acceso aos seus servizos o mes que vén.
Cómpre lembrar que en setembro Android 2.3.7 chegaría aos 10 anos, polo que é demasiado antigo e supón todo un risco para a seguridade, á vez que o seu uso é completamente residual. De feito, menos do 0,2% dos dispositivos con Android empregan unha versión do sistema operativo inferior á 4.0.