Adeus ás xuntanzas de longa duración de balde en Google Meet

Ante o auxe do teletraballo por mor da pandemia, en 2020 o servizo de videoconferencia premium Google Meet abriuse de balde para todos, de xeito que particulares e estudantes podían acceder a funcións que ata o momento estaban limitadas a usuarios empresariais, aínda que adiantando que esta xenerosidade por parte de Google tiña data de caducidade. Inicialmente falaban de que o servizo seguiría ilimitado ata setembro de 2020, logo ampliaron o prazo ata marzo de 2021; e finalmente é agora cando anuncian o remate da versión premium de Google Meet para todos os usuarios.
A partir deste mesmo mes, as xuntanzas grupais con tres ou máis participantes volverán a ter un límite de tempo de unha hora, mentres que as xuntanzas individuais manteñen a limitación de tempo de 24 horas. Deste xeito, Google quere animar aos usuarios que teñen que realizar xuntanzas en grupo de longa duración contraten o plan Premium de Google One.
Deste xeito, por 9,99 euros/mes os usuarios poden gozar de almacenamento de 2 TB para Gmail, Google Fotos e Google Drive, xuntanzas en grupo máis longas en Google Meet, videochamadas en directo en YouTube, cancelación de ruído de fondo en Meet e gravación de videochamadas en Meet, beneficios que poden compensar a usuarios que realizan un uso intensivo ou profesional destas ferramentas, aínda que non desenvolvan estas actividades dentro dunha empresa.