As descargas dos máis de 16.000 bonos turísticos autonómicos esgotáronse en menos de 15 días

Turismo de Galicia fixo un novo balance da actividade xerada pola nova campaña do Bono Turístico autonómico, concibido no contexto da pandemia para dinamizar o consumo turístico e inxectar liquidez ás empresas do tecido turístico galego. Segundo fixo saber o Goberno galego, as descargas dos máis de 16.000 Bonos Turísticos esgotáronse na xornada deste 16 de xullo, menos de quince días despois de que se abrise o prazo para que os galegos comezasen a facerse con el.
A Xunta engadiu que “o interese do Bono Turístico da Xunta xa se deixou notar desde os primeiros días, cun centenar de bonos turísticos emitidos por minuto nas primeiras horas e cun balance de preto da metade dos bonos descargados o primeiro día”.
Son bonos en formato código QR cun importe de 150€, cofinanciados nun 40% pola Xunta de Galicia en nun 60% polas persoas que o solicitaron (os particulares abonarán, polo tanto, 90€ para contar cun bono por valor de 150€).
Nesta edición, como novidade, cada usuario podía descargar ata dous bonos, polo que poderá contar cun investimento de ata 300€ para gozar dunha estadía en outono nalgún dos establecementos que se adhiran. Os beneficiarios poderán empregar os seus bonos desde o 10 de setembro ata o 25 de decembro de 2024, ambos incluídos.
O prazo para que as empresas se adhiran continúa aberto ata o vindeiro 2 de decembro.
A día de hoxe xa forman parte da campaña deste ano máis de 350, entre establecementos de aloxamento e axencias. As empresas interesadas en sumarse poderán facelo tamén vía web.