Nintendo anunciou un amplo programa de celebracións polo 40º aniversario de The Legend of Zelda, que incluirá o lanzamento de The Legend of Zelda: Ocarina of Time para Nintendo Switch 2, unha edición temática da consola, novos accesorios, concertos internacionais e a estrea dunha película de acción real baseada na saga.
O aniversario foi presentado no Nintendo Direct celebrado esta tare, no que tamén se mostraron as principais novidades da versión de The Legend of Zelda: Ocarina of Time para Nintendo Switch 2. O xogo chegará o 5 de novembro cunha revisión completa dos gráficos, tempos de carga máis curtos, maior fluidez, efectos de son refinados e banda sonora orquestral.
A adaptación incorpora tamén cambios nos controis e na exploración. Link poderá saltar e correr libremente mediante os botóns, mentres que a cámara poderá controlarse coa panca dereita. As localizacións de Hyrule foron remodeladas e o ciclo de día e noite funcionará sen interrupcións, mesmo en zonas como a cidadela de Hyrule ou os núcleos de poboación.
As secuencias cinemáticas serán máis extensas e contarán con dobraxe completa ao español, acompañada de novas liñas de diálogo para os personaxes. Tamén se incorporará unha cronoloxía que permitirá consultar o progreso da aventura e o seguinte obxectivo en calquera momento.
Unha das novidades máis singulares será a interacción coa ocarina mediante o micrófono da Nintendo Switch 2. Os xogadores poderán tararear unha melodía aprendida por Link para que este a interprete dentro do xogo. O sistema tamén recoñecerá o son de instrumentos externos, incluídas as novas ocarinas que se comercializarán con motivo do aniversario.
A edición física de The Legend of Zelda: Ocarina of Time terá, ademais, unha primeira tiraxe cunha carátula de acabado brillante e metalizado, dispoñible ata fin de existencias.
Os produtos conmemorativos chegarán o 29 de outubro, unha semana antes do xogo. Entre eles haberá unha Nintendo Switch 2 con deseño inspirado na Triforza, un mando Pro de Nintendo Switch 2 (cunha versión que incluirá soporte expositor) e unha funda con protector de pantalla.
Tamén están previstas dúas novas ocarinas. Unha será totalmente funcional e permitirá interpretar melodías, mentres que outra, fabricada por HORI, será electrónica e poderá reproducir notas ou cancións completas mediante un botón.
En 2027 chegarán dous novos amiibo de Link neno e Zelda nena, que permitirán desbloquear máscaras especiais inspiradas no aspecto gráfico clásico da saga. O amiibo do gólem de Mineru, procedente de The Legend of Zelda: Tears of the Kingdom, lanzarase antes, o 17 de setembro.
Nintendo tamén ampliará as funcionalidades de Zelda Notes, o servizo integrado na aplicación Nintendo Switch App para dispositivos intelixentes. A versión compatible con Ocarina of Time permitirá consultar un resumo diario da partida, seguir pistas para localizar lugares de Hyrule, tocar unha ocarina virtual e participar nun reto diario con máis de 2.000 preguntas.
O sistema de rastreo de rumores proporá localizacións que os xogadores deberán identificar a partir de pistas visuais. Ao atopalas recibirán puntos que poderán trocar por partituras para a ocarina. A aplicación permitirá tamén crear composicións propias coa ocarina virtual e compartilas mediante códigos QR.
O 40º aniversario terá tamén unha vertente musical. Nintendo organizará unha xira mundial de concertos durante 2027, que comezará en Tokio en xaneiro e chegará a Chicago en febreiro. A xira europea arrancará en Londres en abril, mentres que a australiana comezará en Melbourne en maio.
O Nintendo Museum de Kioto incorporará entradas cun deseño especial do aniversario desde o 9 de setembro e novas localizacións para fotografarse a partir do 5 de novembro. O museo inaugurará ademais este outono o Super Family Restaurant, onde os visitantes poderán comer acompañados de Link e doutros personaxes de Nintendo, e manterá actividades relacionadas coa saga durante un ano.
Nintendo Today! comezará tamén a ofrecer tarxetas dixitais de The Legend of Zelda, ademais de novas animacións de calendario relacionadas cos diferentes xogos da serie. Entre as colaboracións anunciadas destaca un set de LEGO de The Legend of Zelda: Ocarina of Time con Link e Epona, formado por 1.750 pezas e previsto para a primavera de 2027, así como unha Espada Mestra electrónica fabricada por Hasbro, de aproximadamente 68 centímetros e con máis de 15 efectos de son activados mediante o tacto ou o movemento.
A celebración completarase co regreso dos xogos clásicos e actuais da saga a Nintendo Switch 2 e Nintendo Switch. As edicións para Switch 2 de The Legend of Zelda: Breath of the Wild e The Legend of Zelda: Tears of the Kingdom forman parte da oferta actual, xunto con títulos como The Legend of Zelda: Echoes of Wisdom. Os subscritores de Nintendo Switch Online e Nintendo Switch Online + Paquete de expansión poden acceder, ademais, a diferentes entregas históricas nos catálogos de Nintendo Classics e á banda sonora da serie a través de Nintendo Music.
A grande estrea do aniversario chegará o 30 de abril de 2027, data na que se estreará nos cines de todo o mundo a película de acción real The Legend of Zelda. O filme está sendo desenvolvido conxuntamente por Nintendo, Arad Productions e Sony Pictures Entertainment e estará baseado nas historias, ideas e conceptos desenvolvidos ao longo das catro décadas da franquía.
