O Grupo de Programadores e Usuarios de Linux (GPUL) celebrará o martes 10 de novembro un obradoiro de introdución ao control de versións con Git na Facultade de Informática da Universidade da Coruña. A actividade desenvolverase entre as 17:00 e as 18:30 horas na aula 3.5 e estará impartida por Emilio J. Padrón González.
A sesión está dirixida a persoas interesadas en aprender os fundamentos desta ferramenta, tanto para traballar individualmente como en equipo. Git permite xestionar os cambios realizados en proxectos de software, documentación, ficheiros de configuración ou páxinas web, facilitando o seguimento das distintas versións e a colaboración entre varios desenvolvedores.
O obradoiro abordará os conceptos e operacións máis básicos deste sistema de control de versións, moi estendido no desenvolvemento de software e adaptable a diferentes fluxos de traballo. Prégase aos interesados en asistir que se inscriban previamente.
